અદના, અનામી, સહનશીલ અને ખમતીધર વ્યક્તિઓ ગુજરાતની સાચી ઓળખ છે.
ઈ-વિદ્યાલય
ગુજરાતી શબ્દકોશ
‘બની આઝાદ’- ઈબુક
ગુજરાતી લેખિનીમાં સ્વૈરવિહાર
હોબી વિશ્વ
ગુજરાતી ભાષાને નવલું નજરાણું
ગુજરાતી પ્રતિભા પરિચય
ગુજરાતનાં પનોતા સંતાનોનો પરિચય
Category Archives: સંપાદકીય
ગુજરાતી પ્રતિભા પરિચય – એક નવી ઊંચાઈ
Posted by on ઓગસ્ટ 2, 2017
મુલાકાતીઓની સંખ્યા તરફ નજર કરવાની ટેવ ઘણા વખતથી વીસરાઈ ગઈ છે. પણ આજે એકાએક આ પરિચય બ્લોગના એ આંક તરફ નજર પડી.
સૌ વાચકોના,
મદદ કરનાર મિત્રોના
શુભેચ્છકોના
દિલી ભાવ
અને
પરમ તત્વની કૃપા
વગર
આ શક્ય બન્યું ન હોત.સૌનો હૃદયપૂર્વક આભાર.
વિચાર યાત્રા
Posted by on મે 27, 2016
સંસ્થાઓ દ્વારા, સામૂહિક, સહિયારા પ્રયત્નો દ્વારા થતી સાહિત્યિક પ્રવૃત્તિઓ હવે નેટ ઉપર ઘણી બધી છે.પોતાની કે બીજેથી લીધેલી રચનાઓ પ્રકાશિત કરનારા બ્લોગો તો સેંકડોની સંખ્યામાં છે. પણ એકલે હાથે મિત્રોની રચનાઓનું ઈ-બુક રૂપે પ્રકાશન કરનારનો જુસ્સો ‘મૌલિક’ જ કહેવાય! અને એક નહીં પાંચ પાંચ પ્રકાશનો અને તે પણ માત્ર પાંચ જ મહિનામાં.
કોણ છે એ મૌલિક જુસ્સા વાળો જણ ?
એકત્રીસ જ વરસનો એક તરવરતો યુવાન મૌલિક રામી – એનો પરિચય એના જ શબ્દોમાં અહીં
આ ચિત્ર પર ક્લિક કરો.
અને એ નોંધી લો કે, એનો વ્યવસાય છે – પશ્ચિમી સંગીત !
અને એ પાંચ પુસ્તકો – અહીં….
આ ચિત્ર પર ક્લિક કરો.
એક જ ચોપડી જુઓ અને એમાંના લેખ તો શું – એની રંગભરી રજૂઆત પર પણ મોહી પડશો.
સલામ મૌલિક …..
સલામ આ ઈ-બુકો બનાવવાની એની કળાને….
જ્યાં સુધી ગુજરાત આવા મૌલિકોને પેદા કરશે,
ત્યાં સુધી ગુજરાતી અમર રહેશે
અવનવી ક્ષિતીજો આંબતી રહેશે.
આવકાર
Posted by on મે 16, 2014
ભારતના ઈતિહાસમાં એક નવા, સુભગ, આશાસ્પદ ભવિષ્યના એંધાણ આપતા આજના સર્વ-વિદિત સમાચારની સાથે અહીં એક સરસ, મજેની જાહેરાત કરવાની છે.
આજથી પરિચયો પીરસનારમાં એક ઉમેરો થયો છે.
વડોદરાના નવયુવાન શ્રી. નિર્મલ પાઠક
પિતૃઋણ અદા કરતો, તેમણે બનાવેલો પહેલો પરિચય છે – પ્રો. દીનેશ પાઠક નો ( અહીં ક્લિક કરો )
અલબત્ત આ અગાઉ પણ ‘સૂર સાધના’ પરથી પ્રેરણા લઈ ‘આજની વ્યક્તિ વિશેષ’ ને તેમણે કેલેન્ડરી રૂપ આપ્યું હતુ – એ તો વાચકોની જાણમાં હશે જ. ન હોય તો.. આ રહી … એ જાહેરાત.
ભાઈશ્રી. નિર્મલનો અહીં હાર્દિક સત્કાર કરતાં હરખ થાય છે. ઉમર વધવા સાથે લગભગ બિન કાર્યક્ષમ પડી રહેલા આ પરિચય સંપુટને તેઓ ખુબ આગળ વધારશે; એવી અભ્યર્થના.
‘ગુજરાતી પ્રતિભા પરિચય’ – એક અભ્યાસ
Posted by on જુલાઇ 20, 2013
આ બ્લોગ એક સંદર્ભ બ્લોગ બની ચુક્યો છે. એમાં પીરસેલી કઈ સામગ્રી કેટલી વપરાય છે; એનો અભ્યાસ કરવા આજે મન થયું. ૧૦૦ થી વધારે વાચકોને આકર્ષી શકેલી સામગ્રીનો રિપોર્ટ વર્ડ પ્રેસે ફટ લેતાંકને કાઢી દીધો.
વાચકોની જાણ સારૂ એ આ રહ્યો….
આટલા બધા ઉમળકા માટે સર્વે વાચકોનો ખુબ ખુબ આભાર.
All Time
*છઠ્ઠા વર્ષે – એક નવું સોપાન
Posted by on જુલાઇ 27, 2011
અમને જણાવતાં આનંદ થાય છે કે, ૨૮, મે – ૨૦૦૬ના રોજ ‘ વર્ડપ્રેસ’ પર આ બ્લોગથી શરૂ થયેલી યાત્રાએ પાંચ વર્ષ પૂરાં કર્યાં છે.
ગુજરાતી સારસ્વતોના પરિચય આપવા માટે ‘ગુજરાતી સારસ્વત પરિચય’ તરીકે એની શરૂઆત કરી હતી.
આ પછી બે મહિના બાદ, ૨૧મી જુલાઈ-૨૦૦૬ના રોજ, ‘ગુજરાતી પ્રતિભા પરિચય’ નામનો બ્લોગ, સાહિત્ય સિવાયના ક્ષેત્રોમાં નોંધપાત્ર પ્રદાન કરનાર ગુજરાતીઓના પરિચય આપવા શરૂ કર્યો હતો.
કાળક્રમે આ બે બ્લોગોને અલગ રાખવા કરતાં, એક જ બ્લોગમાં સઘળા પરિચયો આપવાનું ઉચિત લાગ્યું હતું. આથી ૫,એપ્રિલ – ૨૦૧૧થી આ બ્લોગ ઉપર બન્ને બ્લોગોનો સમન્વય કર્યો છે.
આ છ વર્ષની ફળશ્રુતિ…
મુલાકાતીઓની સંખ્યા ૩,૦૯,૫૦૦ હાલમાં રોજના મુલાકાતીઓ ૯૦૦ થી વધુ ( કોઈ જાહેરાત વિના) પરિચયોની સંખ્યા ૪૪૦ અન્ય લેખો ૩૨ પ્રતિભાવો ૨૭૬૮ પાનાં ૧૪ વિભાગો ૯૫
હાલ આ બ્લોગનું સંચાલન શ્રી. કૃતેશ પટેલ અમદાવાદથી કરે છે. પાંચ મહિનામાં તેના હસ્તે ૭૪ પરિચયો મૂકાયા છે. તેના આગમન બાદ, આ બ્લોગે નવી ક્ષિતીજોમાં સફર આદરી છે. એ તો આ બે ચિત્રો કહી જાય છે.
દિવસવાર મુલાકાતીઓ
મહિનાવાર મુલાકાતીઓ
અંતરની આરજૂ છે કે, આ બ્લોગને દસ કૃતેશ મળે. જો આમ થાય તો, મહાજાતિ ગુજરાતીની હજારો પ્રતિભાઓ બ્લોગસ્થ- નેટસ્થ થવા રાહ જોઈ રહી છે.
કમ સે કમ આપ સૌ નેટ પર કોઈ વિશેષ વ્યક્તિ પરિચયની વિગતો મળે તો અમને તેની લિન્ક મોકલી આપી શકો.
આમ..
પરિચય ફાઈલો
અમે આભાર સહિત તેને રજૂ કરીશું.
અંતમાં બ્લોગર આવી ગમે તેટલી રજૂઆત કરે; પણ સમગ્ર ફળશ્રુતિનો મોટા ભાગનો આધાર અને આથી જ તેના યશભાગી તો આપ સૌ જેવા વાચકો જ હોય ને?
ખૂબ ખૂબ આભાર. આમ જ અમારો ઉત્સાહ વધારતા રહેજો.
*પ્રતિભા પરિચયનાં નવાં ઘરેણાં
Posted by on જૂન 24, 2011
આ બે સમાચાર અહીં મૂકતાં હું રોમાંચ અનુભવું છું.
- ઘણા વખતથી ગુજરાતી બ્લોગોમાં સાવ જૂદી ભાત પાડતા, મારા આ પહેલા બ્લોગને ઉચિત ચહેરો આપવાનું મન થતું હતું. આજે નવા મુખડાથી આ ઇચ્છા સંતોષાઈ છે.
- ‘ગુજરાતી પ્રતિભા પરિચય’માં સ્વેચ્છાએ અનુદાન આપવા કટિબદ્ધ બનેલા કૃતેશ પટેલે આ બ્લોગને પરિચયોથી ભરપૂર કરવા – ૧૦૦૦ ના આંકડાને અતિક્રમી જવા – કમર કસી છે. એના આગમન બાદ આ બ્લોગનો વધેલો વપરાશ આ ચિત્ર વધારે સારી રીતે કહી જાય છે –
માર્ચ-૨૦૧૧થી સતત વર્ધમાન
અલબત્ત અમે જાતે જ અમારો જ ખભો થાબડીએ, એવી આ અનધિકાર ચેષ્ઠા તો છે જ. પણ ઉદાર મનના વાચકો અમારો આ હરખ ઊછાળો જીરવી લેશે; એવી શ્રદ્ધા છે. નહિંતર એમના વિના થોડા જ ત્રણ લાખ મુલાકાતીઓના આંકડે પરિચયો પહોંચી શકશે?
અને
અંતરની એક ઇચ્છા…….
થોડીક મહેનત કરવા તૈયાર હોય એવા સ્વયંસેવકો માટે ટહેલ છે –
ગુજરાતનાં પનોતાં સંતાનો કે, જેમના જીવન અને કવનથી ગુજરાતીતા ઊજળી છે; એમનો પરિચય આમ નેટ ઉપર પ્રકાશિત કરવા કમર કસે તેવાં ઉત્સાહી ભાઈ-બહેનોને……
અમારાં સાથી બનવા.
*દ્વિતીય વર્ષના ઉષાકાળે
Posted by on મે 28, 2007
પ્રિય વાચકો,
આજે આ પ્રવૃત્તિને એક વર્ષ પૂરું થયું. ફાધર વાલેસ ની જીવનઝાંખીથી શરુ થયેલી યાત્રા માધવ રામાનુજ સુધી પહોંચી છે. સાથે ગુજરાતના ગાંધીયુગના મહાકવિ શ્રી. ન્હાનાલાલ નો પરિચય પણ આજે મઠારીને ફરીથી પ્રકાશિત થાય છે. આ અમારે માટે બહુ આનંદની ઘટના છે. ગુજરાતી બ્લોગ જગતમાં પાયોનીયર કહી શકાય તેવાં, અને જેમના અમૂલ્ય સૂચનોથી હું અને મારા જેવા ઘણા બ્લોગ જગતમાં પા પા પગલી કરતા થયા, એવાં એસ.વી. બહેને આ બ્લોગને સૌથી પહેલાં વધાવ્યો હતો. તેમના એ શબ્દો દોહરાવતાં મને ઘણો આનંદ થાય છે –
“Let me be the first one to congratulate you. It is a great idea. Thank you for doing it.” – S.V. – May 28, 2006 @ 11:31 am
અને આ દીવસને અનુરૂપ રચના તેમણે પોતાના અત્યંત વ્યસ્ત જીવનમાંથી સમય કાઢીને એક દિવસ અગાઉથી પ્રેમપૂર્વક બનાવી છે – આ બ્લોગ પરની જ બધી સામગ્રી (! ) વાપરીને. આભાર એસ.વી. !
‘ સ્ત્રી સારસ્વત સપ્તાહ’ ને મળેલા આવકારથી પ્રેરાઇને આવતી કાલે એક વધારે સ્ત્રી સારસ્વતની જીવનઝાંખી તમને વાંચવા મળશે. અને એ સાથે કુલ જીવનઝાંખીઓ 270 ની સંખ્યાએ પહોંચશે. આ શુભ ઘડીએ મને એ જણાવતાં બહુ જ આનંદ થાય છે કે, મૂળ જામનગરના અને હાલ વ્યવસાય અર્થે દુબાઇ રહેતા જામનગરના ‘જામસાબ’ (!) શ્રી. નીલેશ વ્યાસ અમારી સાથે ‘ તંત્રી ટોળી માં જોડાયા છે અને આવતીકાલની ટપાલ તેમના હસ્તે પીરસાશે.
આખા વર્ષ દરમિયાન આપ સૌએ આપેલા પ્રતિભાવ અને પ્રોત્સાહન બદલ અમે સૌ આપના અંતઃકરણ પૂર્વક ઋણી છીએ. આવનાર વર્ષમાં પણ આપ સૌનો આવો જ સહકાર મળશે તેની અમને ખાતરી છે.
આજના શુભ દિને અમે નીચે મુજબના નવા વિભાગો પણ શરુ કરી રહ્યા છીએ.
- પુસ્તક પરિચય
અમારા વાંચવામાં આવેલાઅને અમને બહુ જ ગમેલાં પુસ્તકોનો ટૂંક પરિચય અહીં આપવામાં આવશે. - વેબ પર જાણો અને માણો
અમારા ધ્યાનમાં આવેલી ગુજરાતી સાહિત્ય રસિકોને રસ પડે અને કામમાં આવે તેવી વેબ સાઇટોનો ટૂંક પરિચય અને તેમની લીન્ક અહીં આપવામાં આવશે. - લેખક અભ્યાસ
લેખકના જીવન અને કવન વિશેના અભ્યાસલેખો અહીં પ્રકાશિત કરવામાં આવશે. એક શરુઆત તરીકે શ્રી. ન્હાનાલાલ કવિ અને શ્રી. માધવ રામાનુજના સાહિત્યની એક નાનીશી ઝલક આજે પ્રકાશીત કરીએ છીએ. - સારસ્વતોનું અવનવું અહીં અવનવી , જાણવા જોગ માહિતી અવાર નવાર પ્રસીધ્ધ કરવામાં આવશે. શરુઆત કરી છીએ, ‘સારસ્વત દંપતીઓ’ થી …..
ઉપરોક્ત પહેલા ત્રણ વિભાગો માટે જો વાચકો ગુજરાતી યુનીકોડ ‘શ્રુતિ’ ફોન્ટમાં વિગતો ટાઇપ કરીને મોકલશે તો તે નામ સાથે પ્રસિધ્ધ કરવામાં આવશે.
પહેલી ટપાલની સાથે આપેલી સૂચના અહીં ફરી દોહરાવીએ છીએ.
” સર્જકોના જીવનની માહિતીની સાથે તેમની રચનાનો પણ એકાદ ઘૂંટ પીવા મળે તો સોનામાં સુગંધ ભળે તે ભાવથી પ્રેરાઇને, જ્યાં જ્યાં શક્ય હોય ત્યાં ત્યાં સર્જકની થોડીક રચનાઓ અથવા તેની લીન્ક આપવા પણ અમે પ્રયત્ન કર્યો છે. જો આમ કરતાં કોઇના કોપીરાઇટનો ભંગ થયેલો કોઇને લાગે, કોઇ માહિતીદોષ જણાય, કોઇ સુરુચિનો ભંગ થયેલો લાગે અથવા કોઇની લાગણી દુભાઇ હોય તો અને અમને જાણ કરશો. અમે સત્વરે આ અંગે ઘટતું કરી આવી માહીતિ ને અહીંથી વિદાય કરીશું.
પણ અમને આશા અને શ્રદ્ધા છે કે, સૌ સર્જકો અને પ્રકાશકો, તેમ જ તેમના વારસદારો ગુજરાતી ભાષાના પનોતા સંતાનોને માટે વિશ્વ-ગુર્જરી સમાજમાં સભાનતા કેળવવાના આ નિસ્વાર્થ પ્રયત્નોને હૃદયપૂર્વક ટેકો આપશે અને બીરદાવશે. “
બીજી એક વાત. કોઇ પણ ચીજ વિના મૂલ્યે મળતી નથી. આથી અમે પહેલી વાર આપ સૌ પાસે આ પ્રયત્નોના બદલામાં કંઇક મેળવવાની આશા રાખીએ છીએ ! અને તે છે……….
- ગુજરાતી પ્રજાની અસ્મિતાને ગૌરવવાન બનાવવા આપણે સૌ સંકલ્પ કરીએ.
- ગુજરાતી લોકો માત્ર લક્ષ્મીના પૂજારી નથી પણ સારસ્વતોનું પણ બહુમાન કરે છે તેની જગને પ્રતીતિ કરાવવા આપણે સભાન રીતે અહર્નિશ પ્રયત્નો કરીએ.
- દરેક વાચક ઓછામાં ઓછા દસ નવા વાચકોને આ બ્લોગ નિયમિત વાંચવા પ્રેરિત કરવા પ્રયત્ન કરે. અને બીજા ગુજરાતી બ્લોગો અને વેબ સાઇટોથી તેમને માહિતગાર કરે.
- બ્લોગ કે વેબ સાઇટ ઉપર કોઇ પણ સાહિત્ય કે વ્યક્તિના જીવનની ઝલક જ આપી શકાય. આ માધ્યમ પુસ્તકોનો વિકલ્પ ન થઇ શકે. વાચકોને નમ્ર વીનંતિ કે, પોતાના ઘરમાં પોતાને ગમતા પુસ્તકોનું એક નાનું શું પુસ્તકાલય જરુર રાખે, જેથી નવી પેઢી આપણા અણમોલ સાહિત્યનું રસપાન કરવા પ્રેરાય.
અસ્તુ.
તંત્રીમંડળ વતી,
સુરેશ જાની
*પ્રથમ વર્ષ
Posted by on મે 21, 2007
< 28 – મે , 2006 >
અહીં પહેલી ટપાલ પ્રગટ કરી હતી. ‘ ફાધર વાલેસ ‘ ની જીવનઝાંખી આપીને. તે વખતના થોડાક શબ્દો …….
હવે થોડુક આ પ્રવૃત્તિ કેમ હાથ ધરી તે વિશે. મને કવિતા વાંચવી ગમે. વાંચતાં હંમેશ એમ થાય કે, આ કવિને આવો વિચાર આવે છે અને મને કેમ નથી આવતો? ! વળી એમ પણ વિચાર આવે કે, આ લોકોનું જીવન કેવું હશે? મારી પાસે ‘ગુર્જર સાહિત્ય’ ની ચોપડીઓનો સેટ હતો.તેમાં દરેક ચોપડીની પાછળ તે લેખકની જીવનઝાંખી અહીં આપીએ છીએ તેવા જ લગભગ બીબામાં આપેલી હતી. ઇતિહાસ અને જીવનચરિત્રો વાંચવા આમે ય મને ગમે. તરત જ બીજો વિચાર આવ્યો કે આ બધાને વહેંચું તો? નવી નવી શરુ કરેલી બ્લોગીંગની પ્રવૃત્તિને કારણે આ વિચાર આવ્યો. અને તરત જ તેનું અમલીકરણ કર્યું. અને ફાધર વાલેસ મારા છાપે ચઢી ગયા !તેમની વેબ સાઇટ પરથી તેમનો સમ્પર્ક સાધ્યો અને તેમના ખુદના આશિર્વાદ પણ મને સાંપડ્યા.
આજથી સાત દિવસ પછી, એ ઘટનાને એક વર્ષ પૂરું થશે.
તે દિવસે હું એકલો આ કામ ખભે લઇને નીકળ્યો હતો. આજે અમે સાત જણ આ કામમાં યોગદાન આપી રહ્યા છીએ. આજની તારીખમાં 263 જીવનઝાંખી આ બ્લોગ પર આકાર લઇ ચૂકી છે. તમારા બધાના સહકાર અને પીઠબળ વગર આ શક્ય ન બન્યું હોત. અમે આપ સૌએ પાઠવેલા પ્રતિભાવોથી અભિભૂત છીએ અને આપના અંતઃકરણપૂર્વક ઋણી છીએ.
આ પ્રસંગને અનુરૂપ એક વિશિષ્ઠ સપ્તાહનું આયોજન અમે કર્યું છે. આજથી શરુ કરીને સાત દિવસ સુધી દરરોજ એક સ્ત્રી – સારસ્વતની જીવનઝાંખી અહીં આપવામાં આવશે. આજની જીવનઝાંખી અમારી તંત્રી ટોળીના સૌથી યુવાન ( એટલે કે સૌથી છેલ્લા જોડાયેલા મિત્ર) શ્રી જય ભટ્ટે આપેલી છે – સુરતના સમર્થ વાર્તાકાર બહેનશ્રી હિમાંશી શેલત ની ……
આજથી આઠમા દિવસે ગુજરાતી નેટ વાચકોને અમે થોડીક ખાસ આશ્ચ્રર્યકારી ભેટ આપીશું.
– અમીત પીસાવાડીયા, ઉર્મીસાગર, જય ભટ્ટ, જયશ્રી ભક્ત, જુગલકીશોર વ્યાસ, સુરેશ જાની, હરીશ દવે………
*સુધારક સપ્તાહ
Posted by on ફેબ્રુવારી 25, 2007
મિત્રો,
“વીર સત્ય ને રસિક ટેકીપણું, અરિ પણ ગાશે દિલથી.”
આજે વીર નર્મદ ની પૂણ્યતિથી છે.
ગુજરાતના આ પનોતા પુત્રની યાદમાં ‘ગુજરાતી સારસ્વત પરિચય ‘ એક વિશિષ્ઠ સપ્તાહ ઉજવે છે. આ સપ્તાહ દરમિયાન અમે દરરોજ ‘સુધારક યુગ’ ના એક સાક્ષરની જીવનઝાંખી અહીં પ્રકાશિત કરીશું . ગુજરાતી સાહિત્યના આ એવા વિદ્વાનો છે કે જેમણે નર્મદે પ્રગટાવેલી જ્યોતને પ્રજ્વલિત રાખી અને ગુજરાતના સાહિત્ય અને સમાજ જીવનમાં એક નવું પરિવર્તન , એક નવો રેનેસાં ઉદ્દીપિત કર્યો. આપણી વહાલી ‘મા ગુર્જરી’ ના મંદિરના પાયાની ઈંટો જેવા આપણા આ લાડીલા અને પૂજ્ય પૂર્વજોને સ્નેહાંજલી અર્પીને આપણે આપણું ઋણ અદા કરીએ.
આ સપ્તાહની પહેલી જીવનઝાંખી છે –
મને જણાવતાં અત્યંત આનંદ થાય છે કે, આ આખા આયોજનનો યશ અમારા લાડીલા સખા શ્રી. જુગલકિશોર વ્યાસ ને જાય છે. અમે લાડમાં તેમને જુગલકાકા કહીએ છીએ !
*દ્વિતીય શતક
Posted by on જાન્યુઆરી 25, 2007
28મી મે 2006 ના રોજ શરુ કરેલી આ યાત્રા લગભગ આઠ મહીના બાદ આ મુકામે પહોંચી છે. પહેલો પરિચય આદરણીય શ્રી. ફાધર વાલેસ નો આપ્યો ત્યારે આ સંપાદનકાર્યમાં હું એકલો હતો. આજે મારી સાથે પાંચ સાથીદારો છે.
આજનો પરિચય બે વિરલ પ્રતિભાઓથી આપીએ છીએ – સ્વ. શ્રી જયભિખ્ખૂ અને તેમના પુત્ર શ્રી. કુમારપાળ દેસાઇ. આ પિતા-પુત્રની જોડીએ ગુજરાતી સાહિત્યને 400 થી વધુ પુસ્તકોની લ્હાણ કરી છે. અને તેમનું કેટલું બધું સર્જન કાર્ય તો હજી ગ્રંથબધ્ધ પણ થયું નથી ! શ્રી. કુમારપાળ દેસાઇ ગુજરાતી સાહિત્ય પરિષના પમુખ તરીકે, તેમની અમૂલ્ય વહીવટી કાર્યદક્ષતા અને બહોળા જ્ઞાન અને અનુભવનો લાભ મા ગુર્જરીની સેવામાં આપી રહ્યા છે તે આપણા સૌને માટે બહુ જ આનંદની વાત છે.
સૌથી વધારે આનંદની વાત તો એ છે કે અમારા આ પ્રયાસોની ખાસ નોંધ લઇ તેમણે તેમના જીવન સૂત્ર જેવું નીચેનું વાક્ય આજના પ્રસંગે પ્રકાશિત કરવા સ્વમુખે આપ્યું છે :
” જીવન એટલે સત્યની ખોજ. અને એ ખોજ માટે વ્યક્તિ સતત પ્રયાસ કરે છે.એના ભીતરમાં વસતા આત્માનું સત્ય અને બાહ્ય વિશ્વનું સત્ય પામવાનો એનો પુરુષાર્થ હોય છે. અને એક ભૂમિકા એવી આવે છે કે જ્યારે આ બંને સત્ય વચ્ચે એક પરમ સંવાદ રચાય છે.અને એ સત્યના અંશોમાંથી માનવી પરમ સત્ય પ્રાપ્ત કરે છે.આની પ્રાપ્તિ માટે એને બાહ્ય-ભીતર જીવનને ઘડવું પડે છે.અને એ દ્વારા પરમ ચૈતન્યનો અનુભવ કરીને આપોઆપ પરમ સત્યની પ્રાપ્તિ કરે છે. ”
આ માટે અમે સૌ તંત્રીમંડળના સભ્યો શ્રી. કુમારપાળ દેસાઇના અત્યંત ઋણી છીએ.
આજે અહીં આપવામાં આવેલ પરિચયોની સંખ્યા 201 પર પહોંચી છે. મુલાકાતીઓ 20,000ની ઉપર થયા છે અને રોજ આશરે 200 વ્યક્તિઓ અહીં આપવામાં આવતા પરિચયો વાંચે છે. એન્ટાર્કટીકા(!) અને દક્ષિણ અમેરીકા સિવાય પૃથ્વીના બધા ખંડોમાં પથરાયેલા વ્હાલા ગુજરાતીઓ આ સામગ્રીનો લાભ લે છે. આપે એ પણ નોંધ્યું હશે કે માત્ર સંખ્યાથી જ સંતોષ ન માનતાં જેમ જેમ નવી માહીતિ ઉપલબ્ધ થાય તેમ તેમ, આપવામાં આવેલ પરિચયો ફરીથી વાચકો સમક્ષ મૂકવાનો પ્રયત્ન પણ અમે આ સપ્ત્તાહથી શરૂ કર્યો છે. આ સાત દિવસોમાં ચાર જ પરિચયો નવા છે. બાકીના ચારની નવી આવૃત્તિ અમે ઘણા સુધારા વધારા સાથે પ્રસિધ્ધ કરી છે.
મારા નમ્ર મન્તવ્ય પ્રમાણે ‘ ગુજરાતી નેટ જગત’ એ ગુજરાતી સાહિત્યના વિકાસના ઇતિહાસમાં એક નવા યુગનો પ્રારંભ છે. હેમચન્દ્રાચાર્યની પ્રથમ પગલી અને દલપતરામ, દુર્ગારામ મહેતાજી અને નર્મદથી શરુ થયેલી આધુનિક ગુજરાતી સાહિત્યની અવિરત કૂચકદમ આ નવા માધ્યમના સહારે જેટની ગતિથી એકવીસમી સદીમાં આગળ ધસી રહી છે. આપણી વ્હાલી અને મહાન ભાષાના કસબીઓને સત્કારવાનો, સન્માનવાનો આ નમ્ર પ્રયત્ન છે. વિશ્વના કોઇ પણ ખૂણામાં બેઠેલો એક ગુજરાતી પણ આ નમનમાં અમારો ભાગીદાર થઇ શકે છે, તે કેટલી આનંદની વાત છે?
અમને આ વાતનો બહુ જ આનંદ છે. ઘણા મિત્રો કોમેન્ટમાં પણ બહુ જ મૂલ્યવાન પ્રદાન કરી, આપવામાં આવેલી સામગ્રીને વધુ સમૃધ્ધ કરવાનું પૂણ્યકાર્ય કરે છે. આવા પ્રતિભાવો આપીને અમારા ઉત્સાહને આપે વધાર્યો છે તે માટે અમે સૌ આપના ઋણી છીએ.
આવનાર સમયમાં આ યાત્રાને અમે એવા પરિમાણમાં લઇ જવા માગીએ છીએ કે, મા ગુર્જરીનો એક પણ સારસ્વત તેના સન્માન અને અભિવાદનના આ અભિયાનમાંથી બાકી ન રહી જાય. આ સંકલ્પની પરિપૂર્ણતા માટે આપના સાથ અને સહકારની અમને ખૂબ ખૂબ જરૂર છે. સ્વાભાવિક રીતે આ કાર્યમાં ઘણી બધી માહીતિ જરૂરી હોય છે. આથી આવી માહીતિ પુરી પાડીને આપ સૌ અમૂલ્ય સહકાર આપી શકો છો. આપના મિત્રો અને સંબંધીઓને આ પરિચયના નાના શા ઝરણાની જાણ કરશો તો પણ મા ગુર્જરીની મહાન સેવા થશે. દરરોજ એક હજારથી વધુ ગુજરાતી મિત્રો આ ઝરણાના જળથી તેમની તૃષા સંતોષશે તો અમને અમીના ઓડકાર આવશે !
જય જય ગરવી ગુજરાત …..
સુરેશ જાની
‘ગુજરાતી સારસ્વત પરિચય’ અને ‘ગુજરાતી પ્રતિભા પરિચય’ ના તંત્રીમંડળ વતી…
અન્ય તંત્રીઓ
અમિત પીસાવાડીયા : ‘ઊર્મિ સાગર’ : જયશ્રી ભક્ત
જુગલકિશોર વ્યાસ : હરીશ દવે
ગુજરાતી પ્રતિભા પરિચય 
વાચકોના પ્રતિભાવ